KUCHING: Perintah Sarawak terus bebendar bejalaika pengawa ngelaban pengekai virus Rabies ti nyerangkung nyendiaka duti turu, pekereja enggau logistik dikena ngelaban penyakit nya.
Sapit Kepala Menteri Datuk Amar Douglas Uggah Embas madahka, perintah nengeri terus chakah ngelaban penyakit tu nengah chara matau sereta bejalaika sekeda pekara ke patut ba ba baruh Komiti Mutarka Penusah Ngenyit Nengeri (JPBN) Sarawak.
Iya madahka, program kerejasama nagang pengekai rabies tu ngemeratka pengawa pengatur enggau mekanisme fasaliti program nagang rabies ke lebih manah entara ejensi perintah, nambahka daya dikena mutarka enggau nagang penyakit rabies lebih manah agi, nambahka pemereti ati komuniti senentang chara ngelala enggau mutarka isu rabies, nambahka chara mutarka kes nengah timbal ke jampat entara sektor sereta mutarka kes ketup nguna chara bekerejasama, ngemanahka agi program meri vaksin rabies ngagai ukui ti mungkur 70% ari penyampau ukui ke bisi di serata nengeri tu.
Uggah ke mega Chairman JPBN Sarawak nerangka, perintah nengeri program nagang rabies ti nyengkaum nyendiaka anggar ke diguna dikena ngemunaska rabies.
“Perintah Sarawak udah ngemendarka ungkup RM7.07 juta dalam taun tu ba baruh Pelan Tindakan Untuk Program Kawalan dan Pembasmian Rabies 2021.
“Program meri vaksin ukui ti disediaka pechuma sereta meri vaksin ari rumah ke rumah mega bisi dipejalaika,” ku Uggah madah nengah teks jaku iya ti dibacha Menteri Kaunsil Kandang Menua enggau Pengawa Berumah Datuk Seri Dr Sim Kui Hian lebuh bejadika Program Hari Rabies Sedunia maya Hari Enam.
Kelimpah ari nya, iya madahka Neritka Atur Veterinar Ordinan Pengerai 1999, lisin undang-undang enggau atur nagang pemindah ukui dipeda mantu ngurangka penyampau kes positif rabies.
“Aku ngelalau peranak di nengeri tu ngambika terus meri kerejasama sereta nyukung inisiatif, program perintah dikena nagang, nyeliahka sereta ngemunaska rabies ba ukui ke ditupi kitai seraya nagang penyakit nya ngerampit mensia,” ku iya madah agi.
