KUALA LUMPUR, 30 Sept: Bisi RM314 juta ari RM1 bilion wang turu ungkup Opis Menteri Sains, Teknologi enggau Inovasyen (MOSTI) udah dikena bejalaika Program Betuchuk Vaksin Menua COVID-19 (PICK) naka 30 September ke udah.
Ku Menteri Sains, Teknologi enggau Inovasyen Datuk Seri Dr Adham Baba madahka agih belanja nya nyengkaum operasyen Palan Meri Vaksin (PPV) iya nya belanja suwa enggau utiliti, pengawa meresi palan enggau sanitasyen, perengkaguna sereta belanja ungkup pekereja di PPV.
Ku iya madah, agih belanja nya mega dikena ngangkatmanah japai integrasi data enggau sistem lebuh proses meri vaksin ti beguna bendar dalam nambahka penyampau orang betuchuk vaksin ba tetiap Parlimen.
“MOSTI, Opis Menteri Pengerai enggau agensi bekaul mega deka nambahka sistem nyidi kontak nyengkaum sumber data dikena analisis risiko pengekai igi penyakit COVID-19.
“Kelimpah ari nya, tracer hub mega udah ditumbuhka dikena ngemudahka chara nyidi kontak enggau sistem ngatur vaksin (VMS) dikena nyimpan rikod data aplikasyen Vaccine Certificate Verifier ngambika sijil digital vaksin nya bendar nengah kod QR,” ku iya.
Iya bejaku munyi nya nyaut tanya Datuk Seri Wan Azizah Wan Ismail bekaul enggau ungkus PICK sereta strategi dikena nagang pengekai igi penyakit COVID-19.
Pia mega, Adham madahka, RM60 juta mega udah diagihka ungkup pengawa nyidi enggau ngemansangka vaksin di menua tu.
