KUCHING, 29 Sept : Bisi 10 iku peranak menua luar ke nguji tama enggau nadai pemandar ke dalam Sarawak udah mujur ditangkap sereta diburu pulai ulih raban soldadu Markas Divisyen Pertama Infantri Malaysia maya Hari Tiga.
Ku pengari ari raban nya, sida tu nguji tama nengah jalai tikus ba dua endur ti bebida, ia nya di Biawak, Lundu enggau Kampung Stass, Serikin di Bau.
“Pengawa muru keterubah dikereja kena 29 September pukul 11.45 pagi ti ngaul semilan iku PATI ke dipelaba nguji tama ke dalam Malaysia ari Indonesia.
Semua PATI tu ditemu raban ke benung bejalaika pengawa matau ba endur nya lalu asil tasat tetemuka sida tu nadai dokumen pejalai.
9 iku PATI ke beumur entara 21 ngagai 49 taun tu madahka tuju sida tama ke dalam menua Sarawak endang deka ngiga pengawa.
Kelimpah ari nya, pengawa muru pulai PATI ti kedua dipejalaika ba Kampung Stass Serikin urung pukul 11.54 pagi.
“Pengawa nangkap kedua tu tetemuka siku PATI ti nguji tama Malaysia ari tunga ke sama iya nya ari Indonesia,” ku iya madah agi.
Semua PATI tu udah diburu pulai ngagai menua asal sida lalu ripot polis mega udah digaga raban penerit atur.
Soldadu darat meruan mekuhka pengawa matau garis entara menua ngambika nadai peranak menua luar tama ngagai menua Sarawak enggau nadai pemendar. – TVS
