KUALA LUMPUR, 29 Sept : Sekeda langgur dikena ngangkat manah akses tauka japai internet di Sarawak deka majak diatur ngena chara nambahka tikas bungkur 4G di Sarawak ti diatu benung ba tikas 80.82 peratus, ia nya baruh ari pukul rata nasional 94 peratus.
Ku Menteri Komunikasyen enggau Multimedia Tan Sri Annuar Musa, entara kandang endur ti diberi perati ia nya di Julau ti diatu semina bisi bungkur 4G ba tikas 27.34 peratus.
“Bisi seraka ti besai entara Sarawak enggau Julau sereta ba renggat nasional,” ku Annuar.
Iya bejaku munyi nya lebuh nyaut tanya Kaban Parlimen Julau, Larry Sng Wei Shien, bekaul enggau langgur perintah dikena nentuka akses internet enggau telekomunikaysen di Sarawak, tebal agi ba menua pesisir baka di Julau.
Annuar, ke mega Kaban Parlimen Ketereh madahka, entara langgur perintah ba pelilih Julau nyengkaum ngaga 47 menara telekomunikasyen baru sereta ngangkat manah 38 stesen pemanchar, lalu tiga iti ari nya udah tembu digaga lalu pemanchar bukai benung diadu manah.
Kelimpah ari nya, Annuar madahka premis tauka palan ti bisi nyendiaka fiber optik ba menua pesisir deka ditambah ngagai 315 premis lalu 226 ari projek nya udah tembu.
“Ketegal pelilih Julau ba menua pesisir ti nyadi penanggul dalam pengawa ngaga menara telekomunikaysen, perintah udah merambu 46 projek kena meri servis internet nengah jalur lebar satelit,” ku iya nambah agi.
Annuar mega madah, opis iya mega bisi bejalaika program ‘Point of Presence’ dikena nyadung fiber optik ngagai sekula ngambika ulih nyendiaka akses internet ti tegap ngagai 35 iti sekula di Julau berengkah bulan baru.
Ia dikearapka ulih tembu sebedau ujung taun seiti nyin ila ngambika pelilih Julau bisi bungkur internet ti sebaka enggau internet nasional, ia nya bungkur 4G. – TVS
