KUCHING: Opis Menteri Dagang Temuai, Seni enggau Main Asal (MTAC) udah mantaika sekeda Standard Atur Pengawa (SOP) ungkup aktiviti dagang temuai ti udah dikemendarka Komiti Mutarka Penusah Ngenyit (JPBN) Sarawak.
Menteri Dagang Temuai, Seni enggau Main Asal, Datuk Abdul Karim Rahman Hamzah madahka, entara SOP nya baka sebedau mindah mesti minta permit polis enti sema tama ke nengeri tauka bagi menua enggau mesti bisi pemendar enterSarawak ungkup pemindah entara nengeri.
Iya madahka, semua temuai ke deka nemuai mesti nerima dua dos vaksin lalu anak mit ba baruh umur 17 taun ke bedau divaksin mesti begulai enggau apai indai sida ke udah nerima dua dos vaksin.
“Tetiap iku temuai mesti bisi ngembuan Setipikit Vaksin Digital ba dalam aplikasyen MySejahtera tauka kad vaksin asal ti dikeluarka Opis Menteri Pengerai (KKM) enggau nentuka tikas risiko pengerai ba aplikasyen MySejahtera ba status ke baruh tauka kurang.
“Meli tikit bilun, mesan alai endur bemalam, pakej dagang temuai enggau ke bekaul dikena minta permit polis enggau pemendar enterSarawak.
“Mesti mandangka asil peresa negatif ungkup rt-PCR tauka rtk-Antigen (Chulit) dalam timpuh tiga hari sebedau datai di Sarawak tauka mindah entara nengeri,” ku Abdul Karim madah ba aum media maya Hari Tiga.
Kelimpah ari nya, iya nerangka senentang SOP bukai sebedau mindah baka sesiku orang ke bedau nerima vaksin enda dikemendarka nyereta aktiviti dagang temuai, perengka pengangkut mensia mayuh mesti ngemuan kapasiti maksimum 50 peratus, tang ungkup diri sebilik atur nya ulih ditenduka, sereta tetiap iku temuai diperansang meli insuran mindah COVID-19.
SOP ti dikemeratka MTAC lebuh bejalai tauka mindah nemuai iya nya mesti seruran meresa pengerai diri sebilik baka tikas pengangat tubuh enggau kelai COVID-19, mesti nentuka MySejatera ba status kurang risiko enggau “Check-In”, mantaika Setipikit Vaksin Digital tauka kad vaksin ke asal ti dikeluarka KKM enti sema dipinta raban penerit atur tauka pengatur sesebuah premis tauka kedai.
“Tetiap iku temuai mega mesti semampai nguna sengkabung mua ba palan mensia mayuh tauka lebuh nepan perangka pengangkut mensia mayuh.
“Seruran ngasika SOP ti udah ditetapka JPBN Sarawak sereta nyeliahka diri ari 3C ti nyerangkung endur ke sekut, bededat tauka tetutup sereta ngemeranka 3W,” ku Abdul Karim madah agi.
Sepengudah pulai nemuai, enti sema bisi kelai sakit COVID-19, terus beperesa pengerai ba klinik tauka sepital ke semak sereta madahka pekara nya ngagai ejensi dagang temuai ngambi bejalaika pengawa ke patut.
