KUCHING , 28 September : Menteri Besai Datuk Seri Ismail Sabri Yaakub meri perati sentang isu peminta bekaul enggau Sempekat Malaysia (MA63) lebuh mantaika Langgur Pemansang Malaysia Lumpar Ke-12 (RMK12). Iya madahka iya naka ulih mutarka isu ti bekaul enggau peminta sabah enggau Sarawak nitihka MA63.
RMK-12 meri perati ngagai Sabah, enggau Sarawak dikena ngerapitka kaul ekonomi entara nengeri,wilayah enggau menua pesisir ngambika enda tinggal ari pemansang sereta ngambika pemansang tu bela ulih diasai.
Dr. Neilson Ilan Mersat iya nya Pengelicha Kanan Sains Politik Enggau Hubungan Antarabansa Fakulti Sains Sosial Enggau Kemanusiaan di Universiti Malaysia Sarawak (UNIMAS) madahka penemu ti dipansutka Menteri Besai ba Langgur Pemansang Malaysia Lumpar Ke-12 (RMK12) nyemetak madahka deka ngemansangka menua ke apin tentu mansang baka menua Sabah, pia mega menua Sarawak.
“Nyadi enti kitai beratika ba teras lumor 7, ba pun kenang iya nya dia’ iya nyemetak madahka deka nyungkak sekalika deka ngemansangka dua bengkah iti menua tu. Enggau nya reti nya tadi ke penemu sekalika deka langgur penemu ti dipansutka iya nya siti pekara ke chukup manah sereta meri tauka utai ke ulih mai penguntung ngagai menua Sabah enggau Sarawak ba pemansang lalu langgur ti manah baka tu amat manah, nadai tejanggal sereta ngasuh pemansang nyigang kelebih agi ba menua kitai di Sarawak,” ku iya.
Berindik ari nya ku iya kitai sama bisi peluang ngemansangka diri baka menua bukai sekalika bansa bukai.
“ lalu penguntung nya ba menua kitai di Sarawak ditu munyi ke suah disebut sekalika dikenang kitai menua Sarawak enggau Sabah tu endang sigi agi jauh tinggal ari mayuh bengkah pemansang enti dibanding enggau menua tauka endur bukai di Malaysia ditu iya nya kitai agi begunaka sekula, ai ke beresi, sepital pia mega klinik”,ku iya.
Nambah ke nya ku iya diatu nembiak agi belajar begunaka bungkur internet ukai semina ba nengeri tang kelebih agi ba menua pesisir.
“Nyadi aku melaba enti chukup dipejalaika langgur penemu ti baka tu ulih ngansa sekalika ulih nyungkak pemansang kelebih agi ngagai bala kitai ke diau di menua pesisir,”
“Enggau nya kitai di Sarawak ulih ngasaika pemansang baka orang bukai, enda jauh tinggal ari orang lalu langgur penemu tu mega deka mai penguntung sekalika pemanah ngagai ekonomi, rama enggau politik”, ku iya lebuh dikerandau pemberita TVS.
Langgur pemansang tu mega chukup manah ku iya laban pekara tu ulih ngurangka penyeranta enggau jalai ti ngasuh ngangkatka pendiau diri sereta likun nya alai ku iya kitai deka bulih pemaik sereta politik ti tegap.
Kelebih agi ku iya kitai diatu merambu endang diau ba siti ruang bilik ketebal agi ke dikumbai kitai diatu iya nya “Keluarga Malaysia”.
