KUALA LUMPUR: Pengawa nambahka ukum ngagai bala pengaji ti enda nitihka Akta ‘Standard Minimum Perumahan, Penginapan dan Kemudahan Pekerja’ 1990 (diubah 2019) tauka Akta 446 enda engkeman dipejalaika maya diatu.
Ku Menteri Sumber Mensia, Datuk Seri M Saravanan, tu berindik ari gaya ekonomi menua sereta krisis kurang pekereja ti benung ditapi serikat ketegal Atur Nagang Pemindah (PKP) ti dipejalaika sebedau tu.
“Sebedau PKP keterubah, 1.8 juta iku pekereja menua luar bisi mayar nyelatan ngagai PERKESO, tang diatu dalam timpuh setaun udah nya, penyampau tu nurun mimit ngagai 1.1 juta ketegal menua tu napi krisis kurang pekereja.
“Enti ka mulaika baru pemanah ekonomi, kitai mesti nambahka produktiviti ti begunaka mayuh pekereja. Diatu ukai maya ti engkeman endur kitai nambahka ukum,” ku iya.
Diatu pengaji ulih ditinggang ukum RM50,000 enti ditemu salah baruh akta nya.
Pia mega, Saravanan madahka bisi 940 keretas tasat udah dibuka bekaul enggau pengaji ari mayuh bengkah sektor ti enda nitihka atur dalam akta nya maya bulan Ogos ti udah.
“Bisi 618 kompaun udah dipansutka ketegal mayuh macham penyalah baka nadai minta surat akaun endur diau, enda nitihka standard minimum endur diau baka nyendiaka jemari, katil, tilam enggau panggal dikena pekereja, sereta penyalah bukai,” ku iya. – TVS
