LIMBANG: Program betuchuk vaksin ti ngaul nembiak sekula ari Sekula Sekondari (SMK) Limbang ke beumur 12 nyentuk 15 taun ke berengkah dipejalaika kena Hari Minggu bejalai lanchar.
Residen Bagi Menua Limbang, Ir Ahmad Denny Ahmad Fauzi madah, proses betuchuk vaksin tu mungkur 760 iku nembiak SMK Limbang ti direjister nerima tuchuk dos keterubah vaksin Covid-19.
“Tang semina 740 iku nembiak aja datai betuchuk vaksin ba Palan Meri Vaksin (PPV) Dewan Suarah Limbang ketegal bisi sekeda agi kuarantin di Palan Kuarantin enggau Berubat Covid-19 (PKRC),” ku iya maya ngelawa PPV Dewan Suarah Limbang kena Hari Minggu.
Taja pia, iya puas ati enggau sambut ari semua dalam ngelancharka proses betuchuk vaksin tu ti dipejalai ari pagi nyentuk lemai.
Ku iya madah, nembiak ke datai betuchuk vaksin mega diiring apai indai sida ti udah mantu ngemudahka proses rejister vaksin nembiak.
Ahmad Denny ke mega Chairman Komiti Mutarka Penusah Ngenyit Bagi Menua Limbang ngelalau semua komuniti ngasika Standard Atur Pengawa (SOP) ke udah ditetapka berindik ari penambah kes Covid-19 di pelilih Limbang.
Ba awak ke sama, kena 26 September 2021 pelilih Limbang ngerikodka kes pemadu mayuh positif di Rumah Panting iya nya 150 iku.
Berebak enggau nya, Rumah Panting udah diteritka Atur Nagang Pemindah (PKPD) berengkah 27 September 2021.9.27
Ends.
