LUBOK ANTU: Bisi 709 iku nembiak sekula ari dua buah sekula nerima tuchuk vaksin dalam program betuchuk vaksin COVID-19 ungkup nembiak ke beumur 13 enggau 14 taun ti udah berengkah kena 25 September 2021.
Pegawai Klinik Pengerai Lubok Antu, Macklin madah, ari penyampau nya 331 iku mungkur nembiak Sekula Sekondari (SMK) Lubok Antu enggau 378 nembiak SMK Engkilili nerima tuchuk vaksin dos keterubah Pfizer ba Palan Meri Vaksin (PPV) Dewan Komplek Lubok Antu.
“Semua nembiak ba baruh pegai operasyen PPV Komplek Lumba Lubok Antu enggau Engkilili dilalau meresa nama, lumur kad pengelala enggau telefon dikena ngemudahka proses rejister nama dalam MySejahtera,” ku iya lebuh dirandau pengarang berita kena Hari Minggu.
Ku iya nambah, semua nembiak nyengkaum kes ke tinggal tauka sida ti badu sekula ke beumur 12 nyentuk 15 taun iya nya raban nembiak ti deka dikemeratka nerima tuchuk vaksin.
Berebak enggau nya, iya ngarapka semua apai indai meri kerejasama ngagai pengajar enggau raban pengerai ulih ngiring anak sida ba program tuchuk vaksin tu.
Nembiak mega dipinta mai dokumen ke patut baka kad pengelala enggau dokumen ke bekaul dikena ngelancharka proses rejister lebuh betuchuk vaksin.
