SIBU: Sesiku orang ke positif COVID-19 ti benung bejalaika perintah kuarantin di rumah ditangkan anang ngelanggar atur ke udah ditetapka enggaika sida ditinggang ukum.
Koordinator Komiti Mutarka Penusah Ngenyit (JPBB) Bagi Menua Sibu, Dr Annuar Rapaee madahka, sida ke positif nya mesti nyaga seraka diri enggau anang semak sida sebilik ke bukai lebuh bejalaika kurantin kediri ba rumah.
Taja pan pia, Dr Annuar madahka iya bisi nerima ripot senentang bisi sekeda orang ngelanggar atur kuarantin ba rumah lalu pekara tu enda patut nyadi laban mensia mayuh patut udah meretika senentang gerah ke udah dikeluarka perintah bekaul enggau perintah kuarantin.
“Ba baruh Atur Nyeliah enggau Nagang Penyakit Berampit (Chara ke dipejalaika ba kandang endur ke bisi kes berampit) Pelin Mulaika Pemanah Menua 2021, orang ke ngelanggar atur kuarantin ba rumah ulih ditinggang ukum enda lebih ari RM50,000 tauka dijil sepengelama enda lebih ari enam bulan tauka kedua-dua sekali,” ku iya madah nengah laman Facebook maya hari Enam.
Nangkan ke nya, iya ke mega Kaban Kunsil Nengeri (ADUN) Nangka madahka, pekara ke chukup dikemeratka diatu iya nya pemereti ati mensia mayuh bekaul isu tu sereta besaup nagang pengekai igi penyakit COVID-19.
Dr Annuar mega ngelalau sida ke benung bejalaika kuarantin ba rumah napi pengurang perengkaguna ke patut betelefon terus ngagai ejensi perubat ke bekaul ngambika sida dipindahka ngagai Palan Kuarantin Kurang Risiko (PKRC).
“Berindik ari nya, sida ke bejalaika kuarantin ba rumah mesti bisi nyendiaka meter kedap (pulse meter) dikena meresa tikas oksigen ninting hari.
“Enti sema tikas oksigen kita baruh ari 95 terus betelefon ngagai JPBB Sibu, lalu enti sema ba baruh 90 terus ngelawa sepital,” ku iya madah agi.
Kelimpah ari nya, Dr Annuar ngelalau sida ke bisi simptom tauka kelai kena rampit COVID-19 terus beperesa pengerai anang nganti kelalu lama dikena nyeliahka penusah bukai ke enda disangka ulih nyadi.
