BETONG: Siku lelaki lunggar umur ti diripotka lenyau lebuh nurun berikan di Batu Lintang, Layar bedau lama ke udah pulai enggau selamat lemai kemari.
Berindik ari nya, sida sebilik lalu ngaga ripot polis ngeripotka pengelenyau tudah urung pukul 5.33 lemai kena Hari Empat.
Pegawai Bomba Kanan ari Balai Bomba Betong, Hendry Jugah madahka, tudah ke benama Wan Belu ti beumur 61 taun tu diripotka lenyau pengudah enda pulai kenyau ari 22 September.
Raban bomba bejalaika operasyen ngiga enggau nyelamat (SAR) begulai enggau peranak genturung pendiau endur nya dalam kandang radius 500 meter ke Ulu Sungai Batu Lintang.
Tudah dipadahka pulai enggau selamat ke rumah pengudah dipeda datai ngenyit ba dapur bilik sida.
Operasyen ngiga enggau nyelamat diketuka urung pukul 8.01 malam.
