KUALA LUMPUR: Anak serikat Taiyo Yuden Co LTD ti dirintaika ba Bursa Saham Tokyo, Taiyo Yuden (Sarawak) Sdn Bhd ngerembaika perengkaguna ngaga kapasitor seramik mayuh serak di kuching siti eviden ti mandangka Malaysia terus nyadi hab ke dipilih pengeluar global tauka pemeranak puku ari menua luar.
Ngambi ripot ari Bernama, Menteri Pengawa Dagang Entarabansa enggau Industri Datuk Seri Mohamed Azmin Ali madahka, pemutus Taiyo Yuden deka meranak puku modal RM680 juta dikena numbuhka perengkaguna baru nya muka dua ribu peluang pengawa ke bepengelandik tinggi.
Iya nerangka, perengkaguna serikat nya ti ngembuan pemesai 36,500 meter persegi di Kuching nya deka disikap perengka teknologi ke tinggi sereta ngalau kuasa nengah perabung bekuasa solar ti disambung.
“Penteba tu enda ngeruga rampa menua, nambahka penyikar pengeluar sereta ulih ngurangka empas rumah gadung ke tau ngeruga pengerai enggau pemanah rampa menua,”
Semua pekara nya setipak enggau gaya rampa menua, sosial enggau chara pengatur korporat baka ti ditetapka ba dalam Matlamat Pembangunan Lestari Pertubuhan Bangsa-Bangsa Bersatu (PBB).
Kelimpah ari nya, tu mega mandangka pemeranak puku ari menua luar majak pechaya sereta arap senentang gaya ekosistem dagang Malaysia.
“Penyampau puku ke diperanakka nya chukup besai sereta manah ungkup Aspirasyen Meranak Puku Nasional (NIA) dikena nentuka Malaysia terus ba rintai atas nyadi hab tauka pelantar pengeluar global,”
Ku Azmin madah, juluk nya ulih dijapai nengah penambah ba mayuh macham aktiviti ekonomi, numbuhka pengawa ke bepengelandik tinggi sereta mutarka isu tikas ekonomi ke enda sebela seririh enggau komitmen Wawasan Kemakmuran Bersama menua.
Nengah pemujur tu iya pechaya Malaysia deka nyadi menua ti nyapai penumbuh ekonomi ke majak ngerembai, enda bechiping enggau inklusif.
