KUCHING: Taja menua udah nyapai lebih 80 peratus populasyen di nengeri tu udah nerima tuchuk vaksin, tang kes positif Covid-19 dirikodka di Sarawak dipeda mengkang tinggi ketegal ari pemereti mensia mayuh.
Menteri Muda ba Opis Kepala Menteri (Pekara Islam enggau DBKU), Datuk Dr Abdul Rahman Junaidi madah, tu berindik ari mensia mayuh ti ngambi inisiatif deka beperesa kediri empu enggau ukai ari pinta raban ti bekaul.
“Taja kes mayuh, majoriti kategori positif tu iya nya kategori biasa ukai raya.
“Nyadi pekara ke beguna, kitai patut nemu pengerai diri empu sekalika dirampit tauka enda ke alai penyampau kes nya mandangka komuniti kitai ngembuan pemereti ati ti tinggi,” ku iya maya Sesi Randau Khas Pemereti Ati ti diatur Sarawakfm kena Hari Empat.
Rahman Junaidi ke mega Menteri Muda Utiliti (Bekal Ai) madah, semak 90 peratus kes positif di Sarawak ba kategori satu enggau dua.
Nerang silik ku iya madah, sida ti bisi penyakit raya baka asma, tibi enggau penyakit lempuang bisi risiko ulih kena rampit ba kategori 3, 4 enggau 5.
“Enti sepital udah ngesahka sida ba kategori 3, perubat ke silik deka diambi sepital enggau klinik pengerai dikena nentuka penyakit nya enda masuk ngagai kategori 4 enggau 5,” ku iya.
Berebak enggau nya, iya ngarap rayat nemu gaya pendiau diri empu enti patut beperesa nyema kena rampit enggau enda kelalu bepanggai ngagai perintah.
Ku iya nambah, enti perintah udah netapka Covid-19 nyadi endemik, kitai patut besedia neruska pengidup begulai enggau igi penyakit tu.
