TANJUNG MALIM: Pengatur sekula dilalau ngurangka nguna aircon ba kandang endur sekula dikena nentuka sistem enggau kualiti angin ke manah.
Tu siti ari chara pengelikun dikena nyeliahka pengekai COVID-19 enti sema sekula dibuka baru enda lama agi.
Ngambi ripot ari Bernama, Sapit Menteri Pelajar I Datuk Dr Mah Hang Soon madahka, enti sema aircon agi deka dikena mesti ba tikas entara 23 nyentuk ke 26 darjah celcius.
“Kitai ngelalau pengatur sekula ngurangka nguna aircon lalu enti sema nguna anang kelalu chelap laban kitai deka sistem angin ba kandang endur sekula ba tikas ke pemadu manah,”
Dr Mah madahka, opis menteri diatu benung bejalaika pengawa matau dikena nentuka tetiap buah sekula enggau institusyen pelajar ngembuan sistem angin ke manah.
Kelimpah ari nya, iya nerangka, naka ke diatu sida nadai nerima timbal ari apai indai tauka nembiak ke enggai anak sida diberi tuchuk vaksin COVID-19.
Opis menteri agi ba renggat ti keterubah bejalaika Program Betuchuk Vaksin COVID-19 Menua (PICK) ke ngaul nembiak.
“Kitai meda nembiak sekula enggau apai indai chukup sedia enggau gagit ati deka nerima vaksin tu sereta nadai nerima bantah ari sida senentang PICK,”
Berindik ari nya, Dr mah madahka, penerang enggau jaku tesau ke betul mesti dikemesaika agi bekaul program tu dikena meransang apai indai mai anak sida nerima tuchuk vaksin.
Tuju nya dikena nentuka pengelikun anak sida tejamin lebuh pulai baru ke sekula udah tu ila.
Opis Menteri Pengerai (KKM) ngemeratka senentang guna sistem enggau kualiti angin ke manah dikena nagang sereta nyeliahka pengekai COVID-19 maya hari tiga.
