KUCHING:Pengekai igi penyakit COVID-19 ke agi nuntung menua dipeda meri empas ngagai pengidup mensia enda ngira takat umur.
Bepelasarka data ari Opis Menteri Pengerai (KKM) ari bulan Januari 2021 nyentuk ke bulan Jun 2021 sida nerima lebih 122,000 kangau telefon ti minta sukung sosial ari sukut emosyen enggau chara mutarka kes kasar domestik.
Ku Pakar Psikiatri Sepital Sentosa Kuching Dr Zuria Idura Abd Mokhtar madah, lebuh COVID-19 nyerang menua ba renggat keterubah rayat senaka ulih ngelaban penyakit tu enggau chukup ngasika Standard Atur Pengawa (SOP).
“Tang, berindik ari gelumbang kedua enggau ketiga COVID-19 mensia mayuh dipeda ngayanka pengelelak napi pandemik tu.
“Ambika chunto maya kitai ngambi bagi ba maraton deka ngabiska 42 KM nya ukai pekara ke mudah lalu pesereta maraton nya ngembuan runding mesti belanda enggau naka pengelaju ngambika sida ulih datai ba adan kepenudi.
“Taja pia, pengeransing enggau daya fizikal sesiku orang enda sama sereta bebida. Engka bisi ari pesereta udah datai ba 10KM udah berasai lelak tang pengeran sida ke deka menang meransang sida terus belanda,” ku iya madah lebuh dirandau ba dalam program Sejahtera Asia.
Dr Zuria madahka, mayuh macham sebengkah pekara ti nyadi pun kebuah sesiku orang napi pengelelak ketegal pandemik tu baka ari gaya genturung pendiau, pengerai tubuh enggau runding enggau sukung sosial ke diterima sida.
Sepemanjai timpuh pandemik tu bisi sekeda orang diau jauh ari sida sebilik, lalu berandau nguna chara betelefon bisi bida ari kitai betemu mua.
Kelimpah ari nya, sesiku orang ke tusah ati ketegal bisi napi pengelenyau ba sekeda pekara sekalika lenyau pengawa, pengerai, penendu bejalaika pengawa baka selama, sereta orang ke dikesayau ketegal COVID-19.
“Beduduk ari nya, sesiku orang nya deka napi lima renggat baka ngenggaika sesebengkah pekara, nganu nama kebuah pekara tu tau nyadi, betawar ti ngaul sesebengkah pekara, tusut runding enggau kepenudi iya nya nerima pekara ke udah nyadi enggau ati tebuka,” ku iya madah.
Ba renggat nerima enggau ati tebuka nya mandangka sesiku orang nya udah ulih nerima senentang pekara ke udah nyadi ba pengidup sida ti ngujungka sida liat ati nempuh semua pemar ke ditapi nya.
