KUALA LUMPUR, 21 September: Pemujur nembiak politeknik ti nyambung pelajar ba tikas Ijazah Sarjana Muda di Universiti perintah bepanggai ngagai markah merit, penyampau endur puang sereta pemujur chalun nya empu.
Ku Menteri Pelajar Tinggi Datuk Seri Dr Noraini Ahmad madah, kelimpah ari nya, penyulut lebuh nembiak nya maya proses interbiu ti dipejalaika universiti perintah ungkup sekeda program pelajar ti begunaka kompetensi.
“Ba sesi akademik 2021/2022, Opis Menteri Pelajar Tinggi nerima 7,652 chalun ke udah tembu Politeknik ke minta sereta mujur nyambung pelajar ke universiti perintah lalu ari penyampau nya 5,103 (67 peratus) mujur nyambung pelajar.
“Penyampau nya ngayanka penambah sepenyampau lima peratus enti dibandingka 4,445 (62 peratus) ari 7,175 chalun ti minta lebuh sesi akademik 2020,2021,” ku iya nambah agi.
Iya madahka pekara nya dikena nyaut tanya ari Sivakumar Varatharaju Baidu (ADUN Batu Gajah) bekaul enggau peluang pelajar tinggi ke bisi disediaka tebal agi ba universiti perintah ungkup graduan ari politeknik.
Noraini madahka, bisi sekeda pekara ti ngujungka sesiku nembiak nya enda mujur nyambung pelajar ba universiti perintah taja bulih pemutus peresa ba Politeknik tang enda mujur tama ke univerisiti.
“Nitihka analisis ari opis menteri, entara kebuah chalun nya enda mujur tama ke univeristi iya nya enda ulih besemekih enggau chalun ari diploma, asasi, matrikulasi enggau Sijil Tinggi Persekolahan Malaysia (STPM) ke bukai sereta enda mujur lebuh diinterbiu ti diatur sekalika betunga mua tauka nengah tali arus.
Ketiga, sida mega milih program ke mayuh dipinta orang ti ngujungka chalun nya enda bulih penuduk lalu keempat penyampau sesebuah program mega ditatak,” ku iya madah.
Kelimpah ari nya, nembiak politeknik disikap enggau pengelandik nitihka peminta industri tang opis menteri tetap meransang sida nyambung pelajar ngagai tikas ke pemadu tinggi nengah mayuh inisiatif baka program Diploma Politeknik ke Program Ijazah Sarjana Muda Malaysian Technical University Network (MTUN).
