LIMBANG, Sept 21 : Perintah nengeri chakah nambahka tikas pengelaju internet ba genap iti menua di Sarawak dikena nyendiaka perengka guna internet ti chukup ngagai peranak menua tu.
Ku Sapit Kepala Menteri Datuk Amar Awang Tengah Ali Hasan madah, perintah besai enggau perintah nengeri udah ngemendarka agih belanja besai ungkup pekara nya.
“Perintah Besai nengah Program JENDELA udah ngemendarka agih belanja besai ungkup nengeri Sarawak,”
“Di Sarawak, Kepala Menteri udah ngemendarka sepenyampau RM2 billion ungkup perengka guna telekomunikasyen,”
Ku iya nambah agi, kepala menteri udah ngemendarka sepenyampau RM 2 billion ungkup perengka guna telekomunikasyen di Sarawak.
Kelimpah ari nya, Gerempung Multimedia Sarawak (SMA) enggau Gerempung Pemansang Ekonomi Sarawak (SEDC) udah bisi pelin sereta program dikena ngemanahka tikas pengelaju internet ti nyengkaum mengeri besai enggau menua pesisir.
Iya madah munyi nya maya pengerami nyuaka komputer ‘Raspberry PI’ ba 35 buah sekula primari di pelilih Limbang.
Iya mega meri besai terima kasih ngagai Opis Menteri Pelajar, Sains Enggau Pemansik Teknologi (MESTR) enggau perintah nengeri laban udah ngemendarka agih belanja penyampau RM12 juta dikena pengerami nya.
“Nya alai, nitihka gaya COVID-19, teknologi informasyen sigi penting kelebih agi ba sektor pendidikan enggau sektor ke bukai,”
Maya pengerami nya, bisi 900 voucher uniform sekula beungkus RM180 ribu ari Yayasan Sarawak mega diberi ngagai 40 buah sekula enggau geran MRP ngagai kelab pemansang, lumba enggau main sereta sosial opis perintah enggau tujuh Gerempung Apai Indai Enggau Pengajar (PIBG) di pelilih Limbang.
