SRI AMAN, 20 Sept: Aktiviti betanam betupi siti chara ke ulih nyungkak penatai pemisi peranak kelimpah nerima peminta ke tinggi ba dagang.
Tang, mayuh pemar ke ditapi raban pekebun dalam ngemansangka aktiviti betanam lebih agi di menua pesisir ke agi kurang ari sukut perengkaguna.
Menteri Muda Pengelantang Komuniti, Datuk Francis Harden Hollis bisi bejalai matau kebun buah rungan ti diempu Lau Pung Chee ti bepalan di Entulang Pra, Sri Aman.
Encik Lau mega bekunsika peneleba ngagai Datuk Francis senentang aktiviti betanam ti ulih mantu ngangkatka tikas pengidup sida.
Iya ngarapka dudi hari ila perintah ulih meri bantu nengah opis betanam betupi  dikena ngangkatmanah jalai ladang ngambi ngelancharka pengawa bedagang.
Ba awak ke sama, Datuk Francis Harden  mega bejadika pengerami  pesta kuih bulan ti diatur raban Indu Parti Sa’Ati Rayat Sarawak (SUPP) Pampang Simanggang.
Pengerami tu dipejalai dikena ngenang sejarah komunikasyen enggau informasyen penerang sebedau kitai bisi perengkaguna moden dikena bekomunikasyen kemaya hari tu.
Iya ke mega Kaban Kunsil Nengeri (Adun) Simanggang, nyambut pesta tu ba rumah iya empu enggau nitihka standard atur pengawa (SOP) ke udah ditetapka.
Pesta Kuih Bulan tu iya nya kelai penyerakup Komuniti Cina enggau sepenemu mutarka penanggul ba komuniti.
