KUALA LUMPUR, 19 Sept:Menteri Besai, Datuk Seri Ismail Sabri Yaakob sehari tu mantaika Pakej Penjagaan Covid-19 (PPC) ti dijangka deka meri pemaik ngagai kira-kira 3.6 juta ruang bilik ungkup raban B40.
Tu sebagi ari chara nyikap diri ngalih ngagai era endemik Covid-19.
Lebih RM471.6 juta bantu PPC diungkupka perintah besai ti nyengkaum pek sengkabung mua ke ulih diguna baru enggau kit peresa kediri empu covid-19 bela empat iti ungkup tetiap ruang bilik.
Ismail Sabri madah, tetiap ruang bilik deka nerima siti oksimeter dikena ngechek kedap tubuh, termometer sereta broser dijadika malin enggau info sentang pengerai.
“Tu sebagi ari chara dikena ngelempungka tating belanja ruang bilik B40 enggau ngelatih diri ngemeranka norma baru lalu mantu nyaga ruang bilik ari kena rampit COVID-19,” ku iya dalam siti penerang sehari tu.
Ismail Sabri madah, pemeri bantu PPC maya ke diatu deka berengkah diberi ngagai penerima Bantu Prihatin Rakyat (BPR) ti udah belaki bebini.
“Sida tu iya nya raban ruang bilik B40 ti udah berumah tangga enggau bisi tauka nadai anak, tauka apai indai tauka apai tunggal ti bisi anak,” ku iya seraya nambah naka ke diatu, bisi 8.4 juta penerima bantu BPR.
Semua pekara ke bekaul bantu PPC tu deka dipadahka Menteri Pengerai Khairy Jamaluddin.
