KUCHING, 19 Sept: Perintah Sarawak deka bekerejasama rat enggau Perintah Besai dalam numbuhka Palan Berubat Riman Sarawak enggau disikap ngena fasiliti moden.
Menteri Kaunsil Kandang Menua enggau Pengawa Berumah, Datuk Seri Dr Sim Kui Hian madah, pekara tu beguna amat ngambika rayat enda ibuh agi ke Semenanjung.
“Tu berindik ari ungkus belanja berubat penyakit riman mar ngujungka mayuh sekeda orang enda ulih berubat ba klinik peribit taja bisi insurans,” ku iya dalam laman Facebook iya kena Hari Enam.
Dr Sim madah, kebendar palan berubat penyakit riman tu nyau deka bulih pemendar ari Menteri Besai ke lama iya nya Tan Sri Muhyiddin Yassin enggau Menteri Pengerai ke suba, Datuk Seri Dr Adham Baba.
“Tang berindik ari perintah besai udah betukar bedau lama ti udah, kitai mesti berengkah ari pun nempa kerejasama enggau Menteri Besai Ismail Sabri Yaakob enggau Menteri Pengerai Khairy Jamaluddin bekaul perambu nya,” ku iya.
Ku iya nambah, Kepala Menteri Datuk Patinggi Abang Johari Tun Openg endang ngambi berat sereta gerah jari deka meri bantu wang ngagai perintah besai ngambika rayat Sarawak bisi fasiliti ngubat penyakit riman ke pemadu manah dalam nengeri enggau naka pengelengkas.
Ba awak ke sama, iya madahka kereban Tomografi Berkomputer Pelepasan Foton Tunggal (SPECT) ke beungkus RM11.63 juta udah datai ba Opis Nuklear, Pusat Jantung Sarawak kena Hari Enam dikena ngangkatmanah kapasiti servis riman di nengeri tu.
