KUCHING, 26 Jun: Opis Menteri Pelajar, Inovasi enggau Pemansang Bakat Sarawak (MEITD) enda kala nyiri sebarang orang, ejen tauka raban orang ketiga ungkup meri Skim Pelajar Tinggi Pechuma Sarawak (FTES).
MEITD nengah sebengkah penerang sehari tu tadi madahka opis menteri nya meri perati berat penerang ti bisi nyebut sekeda raban besemaya meri pelajar pechuma nengah chara ngeletak bayar tauka pampas ngagai mensia mayuh.
Ku MEITD ulah baka nya enda sah lalu diasaika deka nguji nipu.
“MEITD sigi enda kakang ngambi atur undang-undang ngagai sebarang orang tauka raban ke ditemu nipu tauka salah guna nama MEITD enggau perintah Sarawak ungkup tuju nguntungka diri.
“Nya alai, raban opis menteri minta mensia mayuh anang mudah arap ngagai sebarang kangau enggau seruran bejimat ngagai orang tauka raban ke ngaku diri ngarika perintah ungkup pengawa bekaul enggau pelajar pechuma,” ku penerang nya.
Ku tandu penerang nya, sebarang penyangu tauka pengawa nguji nipu patut jampat dipadah ngagai raban bekuasa.
“Sebarang penerang rasmi bekaul enggau FTES semina deka dipansutka MEITD nengah salur komunikasyen rasmi perintah Sarawak,” ku iya.-TVS
