PENGANGKUN enggau penyiru belajar seraya ngemeranka seni, main asal enggau budaya Iban endang patut seruran diterenak ngaul semua renggat komuniti.
Beduduk enggau nya, sekeda bala penyereta ke bisi ngambi bagi dalam kelas ngajat ti diatur Gerempung Ngajat Asal Iban (NGASI) madahka endang nyadi tangkup pengawa rinduka main asal ngajat laban nya ngayanka identiti Iban ti ditampung ari aki ini kelia.
Ku Boniface Lajang James asal ari Sri Aman madah, penyiru ngagai main asal bansa diri endang mesti bisi ba tetiap iku bansa Iban enda ngira renggat umur, baik nya diau ba mengeri tauka ba rumah panjai.
“Main asal kitai baka ngajat tu anang dilengka, taja pan kitai chakah bejalaika pengawa tauka aktiviti ba gerija.
“Pengawa baka tu enda salah ti dipeda ari sukut pengarap. Nya mih kebuah bala kami bebai pangan diri belajar ngajar ba baruh NGASI,” ku iya.
Selubang penemu enggau Boniface, Ameada Clemson asal ari Betong madahka, enda milih sekalika lelaki tauka indu endang patut bisi pengelandik ngajat awakka main asal nya semampai idup sereta ditampung rebak dudi.
“Indu Iban sigi ditemu kitai ngembuan ulah ti mereti, landik ngereja pengawa, mentas sereta siru.
“Penteba baka tu ulih dipeda kitai lebuh sida mantaika bungai ajat,” ku iya.
Entudi ke nya, siku agi nembiak rebak baru, Sharmila Audrey asal ari Saratok, madahka enti rebak baru enggau rebak dudi nadai pengerindu enggau penyiru ke main asal Iban baka ngajat, betabuh enggau ke bukai, pengelandik nya tau lenyau, lela ditabanka arus dunya moden.
“Anang lembau, sanggu belajar ngajat. Taja pan baru deka ngemasaika diri, kitai mesti pechaya ngagai bakat kitai empu. Tu nyadi tanggungpengawa nembiak ngangkatka sereta mantaika pemanah main asal Iban ba tikas lebih tinggi,” terang iya.
NGASI NGANGKATKA BAKAT LOKAL
Chairman Gerempung Ngajat Asal Iban (NGASI), Bartholomew Sirow Chong madahka, semua sida ke nyadi tuai enggau pengajar ba dalam gerempung nya terus chakah ngembing enggau meri latih ngagai sida ke bisi potensyel nyingkang jauh mai main asal Iban ba renggat nasional enggau antarabansa.
“Naka ke diatu, NGASI sigi meri peluang ngagai kaban dalam gerempung tu ngambi bagi dalam pekit ba renggat ke lebih tinggi agi, ukai semina ba dalam Sarawak tauka Malaysia aja.
“Tu siti chara dikena kami ari Gerempung Ukai Dikuasa Perintah (NGO) Dayak bedajaka pemanah, penyelai enggau pemayuh leman seni enggau main asal Iban ngagai komuniti bukai,” ku iya madah.
Bartholomew nerangka, sida dalam NGASI mega suah dikangau merindang bala mayuh ba dalam program budaya ti manah nyadi pelasar meri peneleba ngagai bakat lokal mantaika pengelandik diri.
Kelimpah ari ngajar ngajat, NGASI mega bisi ngajar orang betabuh, begendang enggau bemain perengka muzik tradisional belikan.
PENGAWA NGO BEDAJAKA SENI, MAIN ASAL SEMAMPAI DISUKUNG
Tangkup pengawa Gerempung Ukai Dikuasa Perintah (NGO) Dayak, baka Persatuan Ngajat Asal Iban (NGASI) ngetanka enggau neruska penyeleda seni enggau main asal Iban pengelama 10 taun patut disukung, dipuji sereta diaku, pia ku Datuk Snowdan Lawan.
Iya ke nyadi Sapit Menteri Dagang Temuai, Industri Kreatif enggau Seni Pemerindang Sarawak madahka, pengeran enggau pengepuh NGASI patut diteladan NGO bukai dikena nentuka main asal etnik di Sarawak semampai ditanka.
“Sebedau tu aku bisi dipadahka mayuh penyereta udah mujur belajar ngajat enggau NGASI sereta nerima setipikit tembu kelas.
“Taun tu tadi, bisi 51 iku penyereta ti mujur tembu kelas ngajat ba baruh embing pengajar tauka pelatih NGASI,”terang iya.
Snowdan nerangka, sida ke ngambi bagi dalam kelas ngajat nya ngaul sida besai tuai, nembiak sereta anak mit ti belajar ngajat tikas ‘basic’ enggau ‘advance’ pengelama dua bulan.
Iya mansutka jaku nya nengah teks iya ti dibacha Sekterari Politik ngagai Premier Sarawak, Dato Nyomek Nyeap beserimbai enggau pengerami Makai Lemai Ulang Taun Persatuan Ngajat Asal Iban (NGASI) ke-10 empai lama tu tadi di Kuching.-TVS
