SRI AMAN, 19 Sept: Pengawa muka premis dagang meri empas ti positif kelimpah nyungkak sektor ekonomi rayat.
Menteri Muda Pengelantang Komuniti, Datuk Francis Harden Hollis bisi bejadika pengawa muka sektor ekonomi di sitak Sri Aman, kemari.
Premis dagang tu ngaul dua buah kedai makai enggau sebuah palan bebelika barang ti udah berengkah beoperasyen taja menua tekeruga betapi enggau pandemik Covid-19.
“Pengawa muka sektor ekonomi tu deka meri pemaik sereta ngemudahka komuniti di bagi menua Sri Aman dalam ngulihka barang ti diguna ninting hari seraya nempa pengawa dagang ti manah,” ku iya maya bejadika pengawa muka premis dagang di Sri Aman, kemari.
Harden ke mega Kaban Kunsil Nengeri (ADUN) Simanggang madah, kedai ti dibuka rasmi tu iya nya kedai Lai Chuar Corner enggau Chung Hua Food Court sereta palan bebelika barang Aldi Supermarket.
Ku iya madah kedai tu bepalan ba Chung Hua Commercial Centre ke baru aja tembu digaga.
Pengempu kedai makai Lai Chuar Corner ke mega diri menyadi Kueh Kwang Chin enggau Kueh Kwang How madah, pengeransing deka maju ba pengawa dagang meransang seduai bebendar ngaul diri ngambi risiko sereta nyerungkai menu ke ulih dilakuka.
Berebak enggau nya, pemansang aktiviti dagang tu deka terus ngangkatka sektor ekonomi orang dagang enggau peranak kandang menua nya.
Ku iya madah, gaya tu ngayanka Sri Aman maju setipak enggau singkang sektor ekonomi endur bukai.
