BAU, Sept 18 : Siku lelaki ke nadai pengawa lalu dipelabaka gian dadah bansa syabu mujur ditan polis ba sebuah rumah di Kampung Pisa, Krokong, Bau kena Hari Enam.
Ku Tuai Polis Pelilih Bau DSP Poge Nyaon madah, saspek beumur 33 taun nya ditan raban Seksyen Tasat Pengawa Jai Narkotik Indu Opis Pelilih Bau urung pukul 10.00 pagi.
hIya madah, polis bisi tetemuka 0.44 gram dadah bansa syabu ba bilik tinduk saspek.
“Dadah ke ditemu raban polis bedau dikena saspek,” ku Poge.
“Saspek dibai ngagai Seksyen Tasat Pengawa Jai Narkotik ngambika bejalaika peresa ai kemi lalu ditemu positif dadah bansa metamfetamina.”
Berindik ari nya, Poge madahka asil ari tasat sebedau tu, saspek udah suah enggau aktiviti salah nguna dadah ba pun taun tu lalu bulih bekal dadah nya ari kaban iya.
Pengawa saspek nya ditemu asil pemadah ari mensia mayuh ke besaup nagang salah nguna dadah, lebih agi ngagai raban nembiak.
Kes nya ditasat baruh Seksyen 12 (2) Akta Dadah Berbahaya 1952.
