KUCHING, 23 : Serakup Bala Bini Menteri enggau Sapit Menteri Sarawak (SABATI) ngasaika bini Premier Sarawak Tan Sri Abang Johari Tun Openg, niang Puan Sri Juma’ani Tuanku Bujang siku indu ke nelap sereta penuh enggau budi basa lebuh bejaku.
Sapit Presiden SABATI Datuk Doreen Mayang madah sekumbang gawa begulai enggau niang ke mega Presiden SABATI, iya mega kediri pengeransing enggau penelap dipandangka niang maya bejalaika pengawa pengasih.
“Iya mega seruran meri lalau ngagai kami dalam bejalaika pengawa nyadi bini pengari rayat.
“Pia mega, iya mega siku orang ti rinduka seni kraf baka keringkam enggau kain sungkit kelimpah mayuh nulung ngelaluka nya ngagai mensia mayuh,” ku iya madah ngagai pemberita pengudah tembu meri basa kepenudi ba Masjid Jamek Nengeri Sarawak, ditu sehari tu tadi.
Berebak enggau nya, Menteri Pemansang Indu, Anak Mit enggau Pengelantang Komuniti Sarawak Datuk Seri Fatimah Abdullah ngasaika niang Juma’ani siku bini chunto laban ti kelalu nelap, tang nyemetak lebuh mantaika pesan enggau jaku lalau.
“Pemidang tu diasai semua opis menteri laban niang chakah nyukung program ungkup indu, orang tuai enggau raban nyelai pendiau (OKU) sereta seruran datai maya pengerami Orang Indu Renggat Nengeri.
“Kami deka lelenggauka penatai enggau tuchum ari tiap kali bisi program. Sampi kami ngambika semengat niang diengkah begulai enggau orang ti ngasika Tuhan enggau ulah badas,” ku iya.
Tubuh niang Juma’ani diengkah ba Masjid Jamek ungkup pengawa meri basa kepenudi sebedau ke dianjung ngagai Pendam Islam Samariang, ditu.-TVS
