KUCHING, 23 Jun: Asai sinu ngemenuhka Masjid Jamek Nengeri, Petra Jaya ditu sepengudah sentubung niang Puan Sri Juma’ani Tuanku Bujang datai ungkup pengawa meri basa kepenudi enggau sembiang solat sehari tu tadi.
Kerita ke ngundan sentubung bini Premier Sarawak Tan Sri Abang Johari Tun Openg nya sangkai pukul 10.15 pagi.
Bela nyempulang pejalai ke sida mai sentubung nya, Abang Johari enggau dua iku anak iya Abang Abdillah Izzarim enggau Dayang Norjihan.
Masjid Jamek Nengeri berengkah dedat laban mensia mayuh ari pukul 9.30 pagi ungkup pengawa meri basa kepenudi.
Bela datai kia ketetiga Sapit Premier Sarawak Datuk Amar Awang Tengah Ali Hasan, Datuk Amar Dr Sim Kui Hian enggau Datuk Amar Douglas Uggah Embas sereta raban Kabinet Perintah Nengeri Sarawak.
Tubuh niang diengkah ba Masjid Jamek berengkah 10 pagi nyentuk 12 tengah hari ungkup pengawa meri basa kepenudi sebedau ke dianjung ngagai Pendam Islam, Samariang ditu.
Juma’ani, 76, midang ba sebuah palan perubat peribit pukul 3.34 pagi tu tadi.
Niang iya nya anak ngagai Tuai Pemegai Menua (TYT) Nengeri Sarawak kedua Tun Tuanku Bujang Tuanku Othman.-TVS
