KUCHING, Sept 18 : Siku lelaki tuai umur udah rugi ngenyampau RM 48,340 ketegal ditipu individu ke nyaru diri nyadi pegawai bank negara kena 6 September 2021 apin lama ti udah.
Sapit Tuai Polis Pelilih Padawan DSP Lim Jaw Shyong madah, tudah ke beumur 60 taun ari Taman Matang Jaya bisi nerima message madahka kad kredit iya bisi dikena meli barang nengah tali arus ti beungkus RM2,639.10.
Ku iya, tudah lalu dipinta betelefon ngagai siti lumur ari Bank Negara lalu orang ke nyaut telefon nya madahka diri pegawai bank.
“Pegawai bank lalu madahka kad kredit iya udah direjister ba Mid Valley, Kuala Lumpur lalu iya minta sebarang penerang ti bekait enggau kad kredit tudah,”
“Tudah nitihka jaku iya ketegal iya arapka pegawai bank nya ke madah akaun bank iya deka dibeku awakka iya enda ditipu orang bukai,”
Ku iya nambah agi, saspek mega minta penerang senentang akaun bank tudah dalam tali arus ti nyengkaum Kod Pengesahan Transkasi (TAC) ti udah diterima tudah.
Sepengudah saspek bulih penerang nya, tudah nerima mesej notifikesyen madahka bisi transeksyen mindah duit ari akaun tudah.
“Anggar pengerugi tudah iya nya ngenyampau RM48,430.”
Kes ditasat ba baruh Seksyen 420 Kanun Keseksaan ia nya pengawa nipu, lalu ulih dijil enda kurang ari setaun enggau enda lebih ari 10 taun sereta dilunsin enggau kena tunggu.
Entudika nya, mensia mayuh ke bisi sebarang penerang ti bekait enggau kes nipu tu tau nganjung ia ngagai whatsapp tauka SMS ngagai lumur 013-211 1222 tauka ngelawa laman web Opis Tasat Pengawa Jai Komersil ba ccid.rmp.gov.my.
