KUCHING, 18 Sept: Komitmen Menteri Besai Datuk Seri Ismail Sabri Yaakob ke deka ngaluska mayuh bengkah pekara ke mesti diputarka nengah Kaunsil Khas Sempekat Malaysia 1963 (MA63) disambut manah Menteri ba Opis Menteri Besai (Parlimen enggau Undang-Undang), Datuk Seri Dr Wan Junaidi Tuanku Jaafar.
Iya madahka, Datuk Seri Ismail Sabri Yaakob meri jamin senentang komitmen perintah besai deka ngaluska pekara nya nengah kaunsil khas ti dichairmanka iya empu.
Ismail Sabri mansutka jaku nya beserimbai enggau pengerami Hari Malaysia 2021 ke diatur ba di Sabah malam ensanus.
Beduduk ari nya, Wan Junaidi ke mega Kaban Parlimen Santubong madahka, bepelasarka prinsip ‘Bekerja Bersama Rakyat’, iya pechaya perintah besai ke diatu deka terus mekuhka pengawa ke meri penguntung enggau pengelantang ngagai rayat di Sabah enggau Sarawak.
“Tuju tu ngambika semua rayat ulih ngasaika pemansang, pengelantang sereta pemaik menua ke enda bechiping.
“Aku ngarika rayat Sarawak enggau Sabah beterima kasih ngagai Menteri Besai Datuk Seri Ismail Sabri ke udah ngemendarka agih belanja RM4.66 bilion ungkup nengeri Sabah enggau RM4.47 bilion ungkup nengeri Sarawak,” ku iya madah nengah siti penerang maya hari Lima.
Ku iya madah, pekara nya ba baruh Rolling Plan 1 2021, Pelin Malaysia Lumpar Kedua Belas (RMK-12) ti deka dibantaika ba aum Parlimen kena 27 September tu.
