MIRI, 14 Jun: Komuniti Dayak diperansang ngena manah semua fasiliti enggau peluang pemansang ti udah enggau benung disediaka Perintah Nengeri.
Sapit Premier Sarawak, Datuk Amar Douglas Uggah Embas nyemetak madahka, komuniti Dayak mesti ngemeratka langkah ti proaktif betapi enggau mayuh macham pemar jeman baru diatu.
“Kitai semua mesti ransing agi gawa, lebih pintar enggau ngambi seraya ngena manah semua fasiliti enggau peluang ke udah bisi disediaka,
“Perintah udah bejalaika inisiatif mantu bala anak kitai ke sekula, nyendiaka sekularship ba universiti lokal, sereta peluang gawa ba dalam sektor baru baka hidrogen, ammonia, aerosingka miga, enggau digital. Semua tu sigi bisi peluang,”ku iya.
Iya mansutka jaku nya rambau bejadika Karnival Gawai Tradisi Tikas Nengeri Sarawak ditu, kemari.
Beduduk enggau nya, Uggah nerangka, pengerami nya ukai semina mantaika pemanah budaya komuniti Dayak aja, tang nyadi pelasar dikena perintah mandangka komitmen pasal pemansang ba menua pesisir sereta meri tumpu ngagai pekara pelajar nembiak Sarawak.
Bekaul enggau aspek pemansang wilayah, Uggah madahka, penumbuh semilan agensi pemansang wilayah di selampur Sarawak endang siti langkah rapat ke nemban dikena nentuka pemansang ba tetiap kandang endur ba nengeri tu sama rata.
“Agensi tu mungkur semua kandang endur di Sarawak, ngaul semua raban bansa sereta komuniti awakka pemansang ba wilayah tu lebih holistik sereta berurun,” terang iya.
Kelimpah ari nya, iya bisi nyebut senentang penyampau RM475 juta udah dikemendarka perintah Sarawak dikena ngemansangka semua rumah sembiang enggau RM90 juta diungkupka ngagai sekula misyen di serata nengeri tu. – TVS
