KUCHING, 11 Jun: Dikena mantu ngetanka main asal komuniti Iban, Gerempung Bakat Dayak Sarikei nengah sukung Kaunsil Seni Sarawak deka ngatur Woksyop Ngerembaika Pantun Iban 2025 kena 26 enggau 27 Julai 2025.
Gerempung Bakat Dayak Sarikei nengah sebengkah penerang madahka, wokshop tu ngembuan tuju deka ngenan sereta ngetanka seni asal pantun ngaul raban nembiak rebak baru enggau mensia mayuh.
Tandu penerang nya, achara tu mega dikena meransang komuniti Iban lebih agi sida ke biak belajar sereta meretika seni pantun ke nyadi lanting budaya ti patut dijaga.
Wokshop tu deka diatur ba rumah panjai Tr Rantai, Luyang Baru, Skim Pengentap Pendiau Baru Sekuau di Sibu, Sarawak.
Program tu dibuka ngagai semua orang enda ngira renggat umur enggau latar belakang lalu deka ngaul penyampau 70 iku penyereta sechara pechuma.
Achara tu berengkah diatur kena Hari Enam, 26 Julai 2025 pukul 8.00 pagi nyentuk 5.00 lemai.
Muak ke malam hari, achara Malam Main Asal deka diatur ari pukul 7.00 nyentuk 10.30 malam ti deka mandangka pengawa main asal nyengkaum bepantun, tanda asal enggau muzik etnik.
Kepenudi, wokshop tu deka diteruska kena 27 Julai 2025 ari pukul 8.00 pagi nyentuk 11.00 pagi, sebedau ditutup sechara rasmi.
Berebak enggau nya, tetiap iku penyereta deka nerima setipikit sereta bisi disediaka pemakai enggau ai irup semanjai program tu.
Nya alai, raban pengatur ngelalau mensia mayuh enda ngira biak tauka tuai diperansang ngambi bagi dalam Woksyop Ngerembaika Pantun Iban 2025.
Ti deka nemu penerang ke silik, mensia mayuh tau betanya ngagai lumur WhatsApp 013-350 5707 tauka 014-500 2685, tauka scan kod QR ti disediaka ba poster rasmi program nya.-TVS
