KUCHING, 16 Sept: Bisi 65,252 iku nembiak di Sarawak udah nerima satu dos tuchuk vaksin COVID-19 naka 15 September.
Ku Kepala Menteri Datuk Patinggi Abang Johari Tun Openg madah, ari semua penyampau nya 61,271 iku ngaul nembiak ke beumur 16 enggau 17 taun.
Berebak ari nya, 3,981 iku nembiak ke beumur entara 12 nyentuk ke 15 taun ti bisi penanggul pengerai tauka komorbid.
“Kita udah ba singkang ke betul nyerumba muka baru pengawa besekula kena 3 Oktober tu ila lalu nembiak ti beumur 16 nyentuk ke 17 taun deka diberi vaksin penuh.
“Tu ngambika sida ulih belajar enggau gaya ke selamat ba sekula.
“Perintah nengeri beterima kasih ngagai apai indai ke udah meri kerejasama ngagai perintah meri anak sida tuchuk vaksin,” ku iya madah.
Iya mansutka jaku nya sepengudah ngemataka pengawa betuchuk vaksin ba Palan Meri Vaksin (PPV) Dewan Majma maya hari Empat.
Berindik ari nya, Abang Johari madahka, penyampau kes ninting hari COVID-19 di Sarawak agi ba dalam pukul rata 3,000 kes lalu nya penambah ari laluh kes sebedau tu.
“Nya kebuah kes kitai ditu agi tinggi laban mayuh peresa COVID-19 dipejalaika kenyau ari bulan siti nyin kemari lalu pemutus semina dikeluarka diatu.
“Taja pia, semua kes tu mayuh ngaul kategori ke enda balat tauka raya. Kes dipasuk ke sepital mega kurang, tu mandangka kitai benung nuju renggat endemik,” ku iya madah agi.
