KUCHING, 23 Mei: Deklarasyen tauka gerah entara perintah nengeri enggau perintah besai dipeda nyadi penerang ngagai pengaku ngaul langkar pengawa matau Sarawak lebih agi nengah Ordinan Pengagihan Gas 2016 (DGO 2016), ke nyadi pemun ngagai pengawa bekunsi strategik dalam sektor minyak enggau gis.
Premier Sarawak, Datuk Patinggi Tan Sri Abang Johari Tun Openg nyemetak madahka, gerah nya netapka penegap runding pasal undang-undang perintah besai enggau Sarawak mesti ditumbuhka sechara manah sereta dibasa.
“Perintah Sarawak sigi nyambut manah penumbuh Deklarasyen Begulai tu nyadi manifestasyen ke terang, mesti dibasa sereta ngaku langkar kereja matau Sarawak, tebal agi Ordinan Pengagihan Gas 2016 (DGO 2016),” ku iya.
Iya mansutka jaku nya rambau aum media ke diatur ba Dewan Sri Sarawak, di Begunan Kunsil Nengeri (DUN) Sarawak, kemari.
Iya nerangka, kerejasama ti ditanggam nya meri penerang ngagai pemekuh industri, sereta negutka tangkup pengawa tauka fungsyen Petroleum Sarawak Berhad (PETROS) nyadi agregator gis tunggal ba wilayah tu.
“Langkar kereja begulai tu ukai semina meri penerang enggau pengandal ngagai industri minyak enggau gis di Sarawak, tang mega meri pengaku ngagai tangkup pengawa PETROS nyadi agregator gis,” tandu iya.
Abang Johari mega madahka senentang semua entiti ke ngaul diri ba pengawa ngelaku, ngagih sereta mekalka gis di Sarawak mesti nitihka DGO 2016, senutuk enggau juluk Sarawak deka matak jalai dalam pemansang sektor kuasa sechara meruan.
“Enti meda ari konteks projek pengidup jemah ti mungkur bakih kunsi antarabansa, semua operasyen PETRONAS ti dipejalaika di Sarawak mesti nengah kerejasama begulai enggau Petros,” terang iya. – TVS
