SRI AMAN, 13 Sept: Dua buah rumah panjai ba baruh Atur Nagang Pemindah Diteritka Agi (PKPD) di sitak Kunsil Nengeri (DUN) Simanggang nerima bantu pemakai.
Kaban Kunsil Nengeri (ADUN) Simanggang, Datuk Francis Harden Hollis nengah kerejasama Parti Sa’ati Rayat Sarawak (SUPP) enggau Raban Indu SUPP ngambi singkang proaktif ngagihka bantu ngagai peranak ba genturung pendiau nya dikena ngelempungka tating sida.
Dua buah rumah panjai ti diteritka PKPD tu iya nya Rh Cr Munan, Ng San enggau Rh Story@Julai, Entawa Wong Padong pengudah bisi ngerikodka kes positif Covid-19.
Harden ke mega Menteri Muda Pengelantang Komuniti madah, rayat patut besedia ngalih ngagai endemik laban kitai begulai idup enggau Covid-19.
“Nya kebuah, beguna bendar nembuka tuchuk vaksin dikena nyaga diri ngambika ba kategori 1 enggau 2 ti nadai kelai sereta enda sakit raya enti dirampit penyakit nya.”ku iya dalam siti penerang kena Hari Minggu.
Berebak enggau nya, Harden meransang apai indai meri sukung ti penuh ngagai anak sida ngambi tuchuk vaksin laban semina nengah chara nya aja ulih ngasuh tubuh ngelaban penyakit Covid-19 sebedau sekula dibuka ila.
“Diatu kitai udah bejalaika pengawa meri vaksin ngagai nembiak beumur 17 enggau 18 taun.
“Pengawa meri tuchuk vaksin nyadika penyikap alai sida besedia maya sesi sekula betunga mua ti belabuh dibuka kena 3 Oktober 2021,”ku iya
Ba awak ke sama, rumah panjai Nanga San nerima chek RM23,000 ari Sapit Kepala Menteri, Datuk Amar Douglas Uggah Embas ti diarika Francis Harden Hollis ngagai Cr Munan Amoh.
Sama bisi datai iya nya Penghulu Mingging Sigan, Cr Denneil Saweng enggau Kapitan Ling Siew Hung ke mega Chairman Raban Indu SUPP Pampang Simanggang.
