KUCHING, Sept 13 : Sepenyampau 12 iku raban jaum jegau di mengeri kuching tembu dua dos vaksin COVID-19 nengah program betuchuk vaksin raban aum jegau bagi pelilih Kuching kemari.
Ku Sekretari Eksekutif Majlis Pembangunan Sosial Dr Zufar Yadi Brendan madah, semua raban jaum jegau ke nerima vaksin nya ngaul 11 iku lelaki enggau siku indu.
“Palan betuchuk vaksin raban jaum jegau iya nya di Panggung Udara Tebingan Kuching, Open Air Market, Balai Polis Padungan, Jalan Laksamana Cheng Ho, Kenyalang Park, Premier 101 enggau Batu 4 bedampih Everrise sereta Matang Jaya.”
Ku iya nambah agi, pengawa meri vaksin ngagai raban jaum jegau udah berengkah kena 5 haribulan Lapan 2021 lalu dalam timpuh nya bisi 31 iku raban jaum jegau udah diberi vaksin dos keterubah.
Nangkanka nya, penyampau 69 peratus tauka 70 iku ari 101 raban jaum jegau udah tembu dos kedua sida naka 11 hari bulan Semilan ti udah.
Pengawa meri vaksin ba tetiap begian ngagai raban aum jegau bepelasarka tiga chara ti engkeman iya nya ba Palan Ngengkahka Raban Jaum Jegau (PPSG), Palan Meri Vaksin (PPV) tauka nguna chara kin kitu.
Tu seriris enggau juluk perintah nengeri Sarawak ngambika nadai siku rayat tinggal tuchuk vaksin COVID-19 dikena nyapai imuniti beraban.
