KUALA LUMPUR, Sept 13 : Parlimen Malaysia bekerejasama enggau Opis Menteri Pengerai (KKM) sereta Kaunsil Pengelikun Menua (MKN) udah nyendiaka sekeda Standard Atur Pengawa (SOP) khas dikena nentuka aum parlimen bejalai enggau lanchar kelebih agi ba Aum Keterubah Keempat Parlimen Ke-14.
Entara sop khas iya nya mesti tembu dua dos vaksin enggau takah 14 hari sepengudah dos kedua sereta bejalaika peresa swab COVID-19 rt-pcr dalam kandang tiga hari.
Kelimpah ari ya, sepemanjai timpuh aum parlimen benung bejalai, semua ti deka datai ngagai begunan parlimen mesti beperesa chulit kediri dikena nyidi igi penyakit COVID-19.
“Semua ti datai ke Parlimen mesti ngasika SOP enggau undang-undang ti udah ditetapka dikena ngatur aum nya bejalai enggau lanchar sereta likun. Enggau tu, pengekai igi penyakit COVID-19 ulih ditagang ba endur Parlimen” ku Tuai Direktor Pengerai, Tan Sri Dr Noor Hisham madahka senentang perkara tu.
