KUCHING, 19 Mei: Rayat di nengeri tu ti benung gawa diberi peluang nampung pelajar sechara pechuma ngagai tikas bachelor degree sechara penuh di institusyen pelajar tinggi ti dipenggi Perintah Sarawak.
Premier Sarawak, Datuk Patinggi Tan Sri Abang Johari Tun Openg madahka, inisiatif nya ukai semina nyelinting nembiak ke udah tembu besekula tang mega meri peluang ngagai orang ke gawa ti udah nangguhka pelajar sida ketegal komitmen diri sebilik tauka belanja.
“Kekadang bisi pekereja ke endang bisi diploma tang gawa tumu ketegal gaya ruang bilik. Ambika chunto, lebuh apai sida udah nadai, anak lelaki patut bebendar gawa sereta ngemeratka tanggungpengawa.
“Taja pia, lebuh maya bala menyadi sida gawa, iya ulih pulai ke kampus nampung pelajar iya. Tu sebagi ari proses ngangkatka pengelandik tauka upskilling,” ku iya.
Iya madah munyi nya ngagai pemberita pengudah Pengerami Nyambut Hari Pengereja Pengawa 2025 Renggat Sarawak ke diatur ba Hikmah Exchange Event Centre (HEEC), kemari.
Ku Abang Johari nerang, inisiatif nya sebagi ari agenda dikena ngangkatka pengelandik seriris enggau guna kemaya hari nyengkaum revolusyen digital enggau Pemintar Artisfisyel (AI).
Taja pia, ku iya agi, pekara ke dikemeratka iya nya mesti bisi status ‘K’ iya nya rayat Sarawak ke sah enggau pelajar mesti dipejalaika sechara penuh di kampus fizikal.
“Enti deka ngasaika pelajar pechuma tu iya nya individu mesti ngembuan status ‘K’ iya nya rayat Sarawak ke sah. Minta ampun ngagai sida ke nadai ‘K’, inisiatif tu semina ungkup pekereja ke ngembuan ‘K’ aja, nitihka pemutus ke udah ditetapka.
“Pelajar pechuma tu semina ungkup siswa penuh degree keterubah ba institusyen ke dipenggi Perintah Sarawak. Tu ukai semina diungkup ngagai nembiak ke udah abis sekula aja, sapa-sapa aja ulih minta.
“Taja pan umur nuan udah manggai 60 taun, asal nuan bedau bisi degree keterubah sereta benung belajar penuh jam ba kampus. Pelajar Jauh (PJJ) enggau luar kampus enda layak,” ku iya.-TVS.
