PUTRAJAYA: Sesi sekula deka dibuka bererenggat nitihka fasa Pelin Mulaika Pemanah Menua (PPN) ti berengkah 3 Oktober 2021 dipejalai enggau chara begintir ninting minggu dikena ngurangka penyampau nembiak dalam sekali sesi.
Menteri Kanan Pelajar, Datuk Dr Radzi Jidin madah, kapasiti nembiak ke sekula ninting minggu ditetapka 50 peratus ari penyampau semua dikena ngurangka risiko pengekai igi penyakit Covid-19.
“Taka penyampau nembiak dalam tetiap kelas iya nya 50 peratus aja. Ambika chunto, kelas Form 5A, bisi 56 iku, nyadi Form 5A deka dibagi ngagai dua kumpulan, 5A Kumpulan A 18 iku, 5A Kumpulan B 18 iku.
“Minggu keterubah nembiak Kumpulan A deka besekula betunga mua, nembiak Kumpulan B deka diau di rumah enggau ngaga PdPR.” ku iya dalam sidang media pengawa muka sekula ba laman facebook Opis Menteri Pelajar kena Hari Minggu.
Opis Menteri Pelajar mutuska nembiak ke datai besekula deka dibagi ngagai dua iya nya Kumpulan A enggau Kumpulan B ba semua kelas pengudah ngambi kira semua pekara.
Tuju tu ngambika nembiak nitihka Standard Atur Pengawa (SOP) dititih seraya nyaga pengelikun enggau nentuka kandang sekula selamat.
