KUALA LUMPUR: Menteri Komunikasyen enggau Multimedia Tan Sri Annuar Musa deka madahka senentang pengawa ti deka dipejalaika opis menteri nya dikena ngemujurka aspirasyen akses bungkur internet ke nyadi siti ari hak mensia.
Ngambi ripot ari Bernama, iya madahka Internet enggau connectivity sebagi ari hak mensia lalu Opis Menteri Komunikasyen enggau Multimedia) benung senaka ulih deka nyapai juluk nya.
“Bisi pekara baru ke deka dipadahka aku enda lama agi,” ku iya madah nengah siti penerang ti dikunsika ba laman rama maya hari enam.
Annuar berengkah bejalaika pengawa nyadi menteri maya 30 Ogos ke udah ngemeratka senentang akses perengkaguna Internet ti dikumbai hak mensia kelimpah ari barang bukai baka gari, pemakai enggau rumah.
Berebak ari nya, Annuar madahka akses internet entara pekara ti diberi perati lebuh iya nyadi menteri KKMM.
“Aku ngarapka program Jalinan Digital Negara (Jendela), akses ngagai perengkaguna Internet mesti dikemeratka laban nya entara pekara ke mai pemansang sereta ngemodenka sesebuah menua.
“Berindik ari nya, peregkaguna baka bungkur Internet mesti dikemanahka tikas awakka setipak enggau menua luar,” ku iya madah agi.
