KUCHING, 11 Sept: Menteri Kanan Pelajar, Datuk Dr Radzi Jidin ngatur aum enggau principal sereta kepala pengajar ba Bagi Menua Kuching berandauka sentang pengawa muka sekula.
Tuju aum diatur dikena ngulihka input enggau ninga penemu sida dalam mantu Opis Pelajar (KPM).
Nitihka penerang ba laman Facebook ke diempu Radzi, aum tu mega digulu Ketuai Sekretari Opis Menteri Pelajar, Datuk Yusran Shah Mohd Yusof enggau Ketuai Direktor Pelajar Datin Seri Noor Zamani Abdul Hamid.
Ku iya madahka, perambu pelin ke manah ba pengawa muka sekula mega bisi diperundingka nyengkaum Sarawak ti diatu udah masuk ba fasa tiga Pelin Mulaika Pemanah Menua.
Raban KPM ti datai di Kuching urung pukul 11 pagi tadi bisi ngelawa Palan Meri Vaksin ngagai nembiak 16 nyentuk 17 taun di Sekula Sekondari Matang Jaya, di Kuching.
Berebak enggau nya, raban sida mega bisi ngatur aum enggau Komiti Mutarka Penusah Ngenyit Nengeri (JPBN) Sarawak ti diarika Menteri Kaunsil Kandang Menua enggau Pengawa Berumah, Datuk Seri Dr Sim Kui Hian enggau Menteri Muda Pelajar, Sains enggau Pansik Teknologi Dr Annuar Rapaee.
