KUCHING: Stress tauka penanggul tusah ati mesti diputarka nguna chara ke betul.
Penangggul tu ukai semina ditapi orang besai tuai tang mega nyengkaum anak mit enggau raban nembiak.
Tebal agi, menua diatu agi dituntung pengekai igi penyakit covid-19 ti ngujungka mayuh macham pengawa tetanggul enggau aktiviti ke enda ulih dipejalaika baka sebedau tu.
Ku Pegawai Psikologi Opis Pengintu Pengelantang Komuniti Bagi Menua Kuching, Mariana Baliron Lenjau madah, penanggul tusah ati meri bekau ke enda manah ngagai pengasai ati, runding enggau ulah sesiku orang.
Beduduk ari nya, enti sema enda diputarka nguna chara ke betul penanggul tusah ati ulih ngeruga pengerai tauka penanggul bukai nyadi.
“Keterubah, kitai mesti nemu tanda tauka kelai penanggul stress tauka tusah ati. Kitai udah nemu pekara ke ngachau runding kitai tauka kitai udah enda ulih napi penanggul nya. Nya pekara ke mesti diperatika kitai dulu.” ku iya madah ba dalam program bicara psikologi cabaran di musim COVID-19 “Jom Tarik Nafas” ti dipancharka terus nengah Facebook KEMAS Jabatan Kemajuan Masyarakat maya hari Enam.
Iya madahka, entara kelai sesiku orang nya napi penanggul tuasah ati iya nya ulah berubah, enda ulih tinduk malam, enda rindu ngereja pengawa ke dikereja ninting hari nya sereta tubuh bisi pemedis bukai.
Mariana mega nerangka, sepengudah sesiku orang nya nemu tanda penangggul nya, sida mesti beratika pun kebuah penanggul nya tau nyadi.
Berebak ari nya, sida mesti ngiga chara ke engkeman dikena mutarka penanggul nya baka berandau enggau diri sebilik, kaban belayan tauka orang ke dipechaya.
“Self-care tauka nyaga diri entara pekara ke ulih dikemeratka kitai. Reti tu iya nya baka ni chara kitai nyaga diri empu sebedau kitai sakit. Enti sema kitai sakit kitai enda ulih nyaga diri empu. Kitai minta tulung orang bukai nyaga tauka ngubat kitai,” ku iya madah agi.
