MIRI, 11 Sept: Sarawak enggau Sabah patut ditukuka nyadi kaban sama setikas tauka dikumbai ‘equal partner’ baka ke udah ditetapka dalam Perjanjian Malaysia 1963 (MA63).
Kebuah pia, laban Sarawak enggau Sabah bela enggau numbuhka Malaysia pengelama 58 taun seriris enggau konsep ‘Keluarga Malaysia’ ti dipadahka Menteri Besai, Datuk Seri Ismail Sabri Yaakob .
Menteri Muda Dagang Temuai, Seni enggau Main Asal Datuk Sebastian Ting pechaya nengah meri basa ngenukuka kaban sama setikas ulih ngangkatka pemansang menua.
“Jampat agi kitai dibasa nyadi kaban setikas, manah agi ungkup menua laban kitai mansang ke mua nyadi sebuah ruang bilik ke besai, ‘Keluarga Malaysia’.
“Tu ulih dipunka enggau ngenukuka Sabah sereta Sarawak nyadi kaban sama setikas,” ku iya pengudah bejadika Program Ziarah Unit Komunikasi Awam Sarawak (UKAS) “Semarak Kemerdekaan” di Grand Old Lady Bukit Kanada kena Hari Enam.
Pengerami Hari Malaysia kena 16 September iya nya hari ti chukup besai reti ngagai rayat Sarawak meretika sentang penumbuh ke bendar Malaysia lebih agi rebak biak laban Sarawak ukai masuk Malaysia tang bela numbuhka Malaysia.
Ting Ke mega Kaban Kunsil Nengeri (ADUN) Piasai madah, pengandal Kepala Menteri ke lama iya nya Niang Tan Sri Pehin Sri Adenan Satem ngetanka kuasa beempu autonomi Sarawak deka terus ditanka.
Ku iya madah, pekara tu beguna ba kitai laban kitai deka nyadi kaban ti sama setikas ukai semina bejaku aja tang pemujur enggau ngaku Sarawak nyadi kaban ti bela sama dalam semua pekara.
“Kitai enda ulih diau diri. Kitai patut lantang bejaku deka nyadi kaban sama setikas,” ku iya nambah.
Diatu (16 Sepetember) sentimen rayat Sarawak enggau Sabah tetap sama ke alai lebuh kitai nyain MA63 suba kitai disemayaka nyadi kaban sama bela.
