MARUDI : Pengawa ngaga tekat ai beguna bendar dikena nentuka taka ai di ulu sungai tau datai ba tikas ti likun jemah ila.
Menteri Muda Kaunsil Kandang Menua Datuk Dr Penguang Manggil madahka, perambu timpuh panjai beguna bendar kena ngurangka penusah bah ti nyadi di Marudi ketegal ai ti datai ari Sungai Baram.
Ku Penguang, tekat ai tu patut digaga ngambika nyadi sebagi ari chara nyeliahka penusah bah laban nengah chara tu, taka ai ti pansut ari ulu sungai ulih ditetap.
Iya bejaku munyi nya maya Hari Lima lebuh iya ngelawa Dewan Suarah Marudi ti nyadi Palan Pengenduh (PPS) ungkup 23 iku orang ari Tanjung Opar ke kena empas penusah bah.
Nitihka penerang, taka ai di Marudi kenyau ari minggu siti nyin suba bisi nurun mimit lalu gaya menua hari mega majak manah.
Kelimpah ari nya, Penguang ke mega Kaban Kunsil Nengeri (ADUN) Marudi bisi mega matau proses meri vaksin ngagai nembiak ke beumur 17 enggau 18 taun ba Dewan Suarah Marudi maya Hari Empat.
Bisi 405 iku orang udah divaksin maya Hari Lima ti ngaul nembiak ari SMK Telang Usan.
Pia mega, Penguang udah ngelawa PPS SMK Telang Usan ti endur 19 iku orang ari lima buah ruang bilik ba Kampung Padang Kerbau enggau Kampung Cina Marudi ngenduh sementara.
Iya matau gaya penusah bah ti nyadi ba Pasar Marudi sereta genturung pendiau ti kena empas penusah nya berindik ari ujan ti enda ngetu.
Gaya tikas ai ba Kampung Narum dipeda ba taka dua ngagai tiga kaki penalam.
