KUCHING: Siku lelaki ti berumur 31 taun udah ditangkap ketegal ngerumpak ngena lungga di Kuching maya hari empat.
Ku Tuai Polis Pelilih Kuching, ACP Ahsmon Bajah madahka, saspek ditangkap urung pukul 2.45 lemai tu ketegal ngerumpak siku orang tuai umur ti berumur 70 taun.
Lebuh penusah nya nyadi urung pukul 5.30 pagi, tudah benung bejalai kediri ke pasar ba Jalai Sungai Maong Kiri Kuching.
“Saspek enggau siku agi kaban iya mujur ngelarika duit tudah sepenyampau RM150.00,” ku iya madah ba dalam siti penerang.
Ku Ahsmon madah agi, tudah bakal ba jari enggau kaki ketegal bibat enggau saspek lebuh penusah nya nyadi.
“Berindik ari nya, tudah berubat ba Sepital Besai Sarawak,” ku iya madah agi.
Asil pansik tetemuka saspek bisi semilan rikod penyalah lama iya nya dua jenayah ulah kasar, siti jenayah bekaul enggau reta tengkira sereta tujuh kes dadah.
Kes ditasat ba baruh Seksyen 395/397 Kanun Keseksaan iya nya Ngerumpak Beraban Nadai Ngena Senyata ti ulih ditinggang ukum jil manggai 20 taun sereta dilunsin.
