KUCHING, 10 Sept: Projek ngaga Balai Mayuhguna Sekula Primari Muara Payang ba baruh Projek Transformasyen Menua Pesisir (RTP) disadang tembu ba bulan Januari 2022.
Menteri Muda Pemansang Mengeri, Pengatur Tanah enggau Rampa Menua, Datuk Len Talif Salleh madah, projek ke beungkus RM400, 000 tu deka berengkah dipejalaika ti meri pemaik ngagai sekula sereta peranak kandang menua nya.
“Projek tu udah lama bulih pemendar pengudah dua kali tinda ketegal nadai kunteriktor di pelilih Sarikei lalu dibuka ngagai kunteriktor luar pelilih Sarikei,” ku iya dalam laman facebook rasmi iya, bedau lama ti udah.
Pengawa nyerahka taba projek RTP Dewan Serbaguna SK Muara Payang diarika Baijuri Jauji begulai enggau pegawai Opis Kereja Raya (JKR) Sarikei ngagai kunteriktor.
Len Talif ke mega Kaban Kunsil Nengeri (ADUN) Kuala Rajang madah, sebengkah agi projek RTP iya nya projek ngaga jalai ari Parit Bugis enggau Bukit Huang ke Muara Payang agi dalam perambu Opis Tali Ai enggau Parit.
“Servis feri dikena ngaul kandang menua tu enggau Tanah Besar Sarikei ba Tanah Putih benung dipansik JKR. Semua projek tu dipejalaika JKR ba baruh Atur Pemansang Malaysia Lumpar ke-12 (RM12),” ku iya.
Nangkanka nya, Len mega bisi nyerahka projek RTP Ngemanahka Ban Simpang Rh Baki ke Rh Johnny di Kampung Sebayang beungkus RM150,000.
Ku iya, penembu projek nya deka meri pengelantang seraya ngangkatka tikas ekonomi peranak kandang menua nya.
