KUCHING , 10 SEPT : Kitai patut nyikap diri sebedau tama ngagai renggat tauka fasa endemik, ku Chairman Serakup Graduet Dayak Sarawak (SDGA), Gary Ningkan.
Komuniti Iban iya nya sebuah komuniti ti unik laban komuniti kitai mayuh diau di rumah panjai, bekunsika ruai sereta mayuh besaup dalam ngereja sebarang pengawa di rumah panjai.
Nya alai, taja kitai deka tama ngagai fasa endemik, tang kitai patut nitihka atur ke udah ditetapka perintah.
“Kitai sama bela nemu igi penyakit Covid-19 tu sigi udah begulai idup enggau komuniti kitai. Diatu perintah benung ngatur chara bagi nyendiaka semua peranak di menua Malaysia tu ketebal agi di Sarawak idup ba fasa endemik Covid-19 tu ila, “ku iya.
“Kitai mesti deka nyikap diri empu tauka komuniti kitai ngambika sida ulih nelebaka diri enggau day idup ke baru dalam fasa endemik tu ila ngambika ekonomi kitai tau idup baru. Orang ti bedagang tauka berengkah beoperasyen tauka muka palan alai sida bedagang belalauka atur pengawa standard (SOP), ku iya lebuh dirandau pemberita TVS.
Nangkan ke nya, Gary mega madahka kitai enda tau sekali ngelengka ke gaya idup ke baru tu kelebih agi ba palan alai gawa, ba makit enggau mega ba sekula. Kitai patut bejalaika tanggung pengawa kitai empu kelebih agi komuniti kitai Iban, anang ngelengka ke SOP baik iya sida ke diau ba menua, rumah panjai, genturung pendiau tauka dini -dini endur diau.
Malaysia dipelaba deka masuk ngagai fasa endemik covid-19 ujung Bulan Sepuluh tu ila.
Berita tu tau dipeda kita lagi ba Berita Iban, pukul 7 lemai ba channel 122, Astro enggau MyTv.
