KUCHING, 2 Mei: TEGAS Lodge Sarawak (TLS) ti deka digaga Tabung Ekonomi Gagasan Anak Sarawak (TEGAS) dipelaba disikap enggau fasiliti moden ngambika ulih matak pengerindu bakat lokal enggau pemeranak puku.
Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh nengah sebengkah penerang ba laman Facebook madahka, pemisi TLS nya jemah bisi daya mantu negapka Sarawak nyadi palan inovasyen digital serantau.
“TLS tu dikearap ulih nyadi palan alai bekunsi penerang, teknologi enggau buah runding ngaul raban digital nomad sereta startup lokal, tebal agi sida ke kala ngambi bagi dalam program ti diatur TEGAS,” ku iya.
Len Talif ke mega Chairman TEGAS meri terima kasih ngagai Opis Tanah enggau Survei (JTS) laban udah meri sukung enggau komitmen dikena nentuka projek nya bejalai lanchar.
Hari Tiga tu tadi, raban TEGAS Lodge Sarawak (TLS) bisi nurun ninjau taba projek TEGAS Digital Village Phase 2 begulai enggau JTS, konsultan sereta Juru Survei.
“Pengawa ngabas taba nya ti diuluka injinir TEGAS betuju ngelala ni bagi adan taba ungkup tanah ke diambi ari perintah,” terang iya.
Sebedau tu, iya bisi madahka projek nya ti deka digaga ngena kos penyampau kurang lebih RM70 juta nya deka disikap enggau hotel, balai ti ulih muat lebih 500 iku orang, sereta perengkaguna bukai baka gim, spa sereta mayuh agi.
– TVS
