LONDON, 1 Mei: Peresa Program Dwijaku Sarawak (UPDLP) ungkup nembiak Primari Enam deka berengkah dipejalaika bulan Oktober taun tu, ku Datuk Patinggi Tan Sri Abang Johari Tun Openg.
Premier Sarawak nya madah, program nya sebagi ari inisiatif strategik dikena perintah negapka pemintar nembiak dalam Jaku Melayu enggau Jaku English, senutuk enggau peminta ekonomi digital jeman diatu.
“Program tu deka diseraris enggau standard antarabansa.
“Jaku Melayu deka dikena bepelasarka silibus nasional, lalu Jaku English dikena ba pengawa tisih bepelasarka silibus antarabansa ti disediaka Cambridge,” ku iya.
Iya mansutka jaku nya rambau aum media pengudah program nyain kerejasama strategik nengah kunterik servis entara Swinburne Innovation Malaysia (SWIM) enggau Cambridge University Press & Assesment (CUPA) di London, kemari.
Abang Johari nerangka senentang pengawa bejalaika UPDLP sigi beguna amat dikena ngadaka nembiak ti landik ngena kedua-dua jaku nya, seraya nyikap sida nampung pelajar dalam bidang Sains, Teknologi, Injiniring enggau Matematik (STEM), lebih agi dalam konteks ekonomi baru ke ngemeratka pekara digital.
“Opis Menteri Pelajar Malaysia (KPM) udah meri pemendar ngagai Opis Menteri pelajar, Inovasyen enggau Pemansang Bakat Sarawak (MEITD) ngambika nempa kerejasama rasmi begulai enggau Universiti Cambridge dikena ngemujurka program tu,” terang iya.
Dua universiti bukai ti bisi dibai sekali ba dalam pejalai enggau pengawa nisih program nya, nyengkaum Universiti Swinburne Sarawak ti ngembuan penuduk betikas antarabansa enggau Cambridge dalam proses tisih ba nengeri tu.
Sama bisi datai, Sapit Premier Sarawak, Datuk Amar Awang Tengah Ali Hasan, Sekretari Perintah Sarawak, Datuk Amar Mohamad Abu Bakar Marzuki, Menteri Pelajar, Inovasyen enggau Pemansang Bakat Sarawak, Dato Sri Roland Sagah Wee Inn sereta sapit menteri ke bukai. – TVS
