KUALA LUMPUR, 1 Mei: Opis Menteri Digital komited deka nentuka juluk menua tu nyadi menua pegari ba ekonomi digital manggai taun 2030.
Sapit Menteri Digital, Datuk Wilson Ugak Kumbong madahka, entara program ti dipejalaika dikena ngemujurka juluk nya nyerangkung inisiatif PEMANGKIN ke meri tumpu ngagai beberapa sektor strategik.
Nengah sebengkah penerang Hari Tiga tu tadi, iya madahka sektor strategik nya ngaul mengeri pintar, finansial digital, enggau agriteknologi ti deka muka lebih mayuh peluang ke manah ngagai rayat tebal agi dalam sektor dagang.
“Kerejasama begulai enggau bakih global baka Vodafone bisi daya mantu ngerumban pemansang teknologi 5G, Internet of Things (IoT), sereta pengelikun siber ba selampur menua tu,” ku iya.
Iya mansutka jaku nya rambau bejadika Vodafone Business Ignite Executive Roundtable ti bejuraika topik pasal “Driving Malaysia’s Digital Economy Through Technology Innovation And Partnership” bepalan ba Pullman Kuala Lumpur City Centre.
Ugak ke mega Kaban Parlimen Hulu Rajang nerangka, pemujur semua pemansang nya jemah ulih nentuka Malaysia terus maju nyadi hab digital besai di ASEAN.
Empai lama tu tadi, iya mega bisi ngulu aum MED4IR Nengeri ke diatur di Pulau Pinang ti dichairmanka Menteri Digital Gobind Singh Deo sereta digulu raban Exco nengeri ke megai portfolio digital ari serata menua tu.
