KUALA LUMPUR: Opis Menteri Pengerai KKM madahka, engka bisi penurun ba pengasi vaksin COVID-19 ti nyadi pun kebuah kes di Sarawak majak niki.
Ngambi penerang ari Bernama, Ku Menteri Pengerai, Khairy Jamaluddin madah, KKM diatu benung beratika senentang deka nguna tuchuk dos ketiga tauka ‘booster’.
Tebal agi, diberi ngagai raban orang tuai umur, orang ke bisi penanggul pengerai enggau pekereja pengerai dikena ngurangka kes nya baka ke udah dipejalaika ba sekeda menua luar.
“Kitai dijangka deka begunaka tuchuk dos ketiga tauka booster,” ku iya madah.
Iya mansutka jaku nya lebuh dirandau pengarang berita bekaul nyangka bisi penurun ba pengasi vaksin COVID-19.
Naka ke diatu, Sarawak mandangka penambah kes ninting hari enggau ngerikodka 3,118 kes.
Khairy mega madahka, iya deka ke nengeri Sarawak ba minggu baru baum enggau perintah nengeri ngiga chara tambah dikena ngurangka pengekai penyakit COVID-19.
Nangkan ke nya, iya madahka KKM enggau Perintah Sarawak deka ngiga strategi ke engkeman dikena mutarka isu pengekai igi penyakit nya ke diatu ba tikas ngirauka ati
