KUCHING, 28 April : Menteri Besai Datuk Seri Anwar Ibrahim udah dikangau ngulu Pengerami Makai Lemai Gala Gawai Dayak Renggat Sarawak 2025 ke deka diatur kena 22 June ba Palan Aum Borneo Kuching (BCCK).
Unit Komunikasyen Perintah Sarawak (UKAS) ti nampung penerang ti dipansutka Sapit Premier Sarawak Datuk Amar Douglas Uggah Embas madah, pengerami makai lemai gala nya ila mega deka dirichahka agi enggau penatai Tuai Pemegai Menua (TYT) Nengeri Sarawak Tun Dr. Wan Junaidi Tuanku Jaafar, enggau Premier Sarawak Tan Sri Abang Johari Tun Openg.
Iya madah antara achara besai bisi diatur iya nya Bazar Gawai Dayak ke deka berengkah ari 15 nyentuk 25 Mei di MJC Batu Kawa, Kuching, Karnival Tradisi Gawai (13- 4 June) di Begunan Gerempung Orang Ulu Sarawak Malaysia di Miri sereta Pengawa Bejalai Beraban Gawai Dayak (21 June) ba Waterfront Kuching.
“Kelimpah ari nya, pengawa bejadika bup besai ke berambaika budaya enggau pesak komuniti Dayak mega deka diatir nyerumba pengerami serak tu,” ku iya.
Ku terang iya mega, gintir komuniti Orang Ulu udah diberi basa nyadi tuai rumah ngatur pengerami Gawai taun tu, lalu Sapit Menteri ba Opis Premier Sarawak (Pengereja Pengawa, Imigresen enggau Pematau Projek) Datuk Gerawat Gala dipadu nyadi Chairman Program.-TVS
